Día 8 - Os Sacramentos

Explicación do día

Os Sacramentos son signos visibles que fan presente unha realidade invisible. Esa realidade invisible non é outra có mesmo Deus.

Os Sacramentos son sete, pois sete son as experiencias fundamentais nas que Deus quere saír ao encontro do home: nacer (Bautismo), paso á vida adulta (Confirmación), o namoramento (Matrimonio) e a consagración ao servizo da comunidade (Orde), o cotián da vida crente (Eucaristía), o fracaso (Penitencia) e a loita contra a enfermidade (Unción).

---

Actividade

Mercaderes tramposos

Nestes tempos que corren un non se pode despistar, necesito a vosa axuda. Un falsificador moi coñecido está intentando venderme falsificacións, axúdame a descubrir algún engano que o deixe en evidencia. Busca en cada cadro os tres erros que disque este falsificador sempre comete.

https://play.makeit.app/?code=433537

---

Oración

Bautismo de San Cenobio (Boticcelli, 1495-1500)

(Antes de comezar a oración, se podes, prende unha candea e coloca ao seu lado un vaso con un pouquiño de auga.)

• Comezamos a oración no nome do Pai, do Fillo e do Espírito Santo.

Aquí temos dous símbolos moi importantes do sacramento do Bautismo, a auga e a luz. A auga límpanos do pecado e a luz enche o noso corazón coa fe. Polo bautismo comezamos a formar parte dunha gran familia, a igrexa, a familia dos que queremos chamar Deus, PAI. Polo Bautismo somos tamén chamados a ser Santos.

• Lectura do evanxeo:

“Tan pronto como foi bautizado, Xesús saíu da auga. E velaí que se abriron os ceos, e viu o Espírito de Deus baixar como unha pomba ata se pousar enriba del. E oíuse desde o ceo unha voz que dicía: Este é o meu fillo benquerido, o predilecto.” (Mateo 3, 16-17)

• Explicación: O día do noso bautismo, Deus pronuncia estas mesmas palabras referidas a cada un de nós. “Ti es o meu fillo amado, a miña filla amada”. Deus é Pai e Nai para cada un de nós.

• Silencio (Repetimos para nós estas palabras que Deus nos di a cada un).

• Introdución ás oracións:

No día do noso bautismo, os que fomos bautizados, os nosos pais recitaron unha oración na que lle pedían a Deus que nos ame, que nos protexa e que nos guíe na vida, como Pai noso que é. Hoxe, podemos repetir nós mesmos parte desa oración e tamén podemos dar grazas ás nosas familias por nos facer este regalo do bautismo, ou en todo caso, bautizados ou non, o regalo mesmo de estar coñecendo mellor a Xesús e o gran amor que Deus nos ten. Respondemos a cada oración: Escóitanos, Pai.

• Oracións

- Pedímosche Señor que sempre vaiamos da túa man para que nos guíes polo camiño do ben, da felicidade plena e da espiritualidade. Escóitanos, Pai.

- Pedímosche Señor, con moita fe e esperanza, que nos protexas da inseguridade, da inxustiza, da desigualdade e dos abusos. Escóitanos, Pai.

- Pedímosche Pai que sempre esteamos dispostos a recoñecer aos que necesitan axuda e tamén a forza para axudar a quen nos necesite. Escóitanos, Pai.

- Pedímosche Señor polas persoas que perden a fe e a esperanza, para que saibamos axudalos a que se acheguen a Ti. Escóitanos, Pai.

- Grazas Señor, polo sacramento do bautismo, que limpa o noso corazón e enche a nosa alma e grazas por aqueles que fan posible que te coñezamos mellor. Grazas, Pai.

• Rezamos xuntos o Noso Pai

Noso Pai que estás no ceo

Santificado sexa o teu nome

Veña o teu Reino

E fágase a túa vontade

Aquí na terra coma no ceo

Danos hoxe o noso pan de cada día

Perdoa as nosas ofensas

Como tamén perdoamos nós a quen nos ten ofendido

Non nos deixes caer na tentación

Mais líbranos do mal

Amén

• Rematamos a oración no nome do Pai, do Fillo e do Espírito Santo.